Minnist Kinu Rochford: „Einn af þeim eftir­minni­legri sem maður hefur verið með í liði“

Rochford var skotinn til bana þegar hann var að spila körfubolta í Harlem í New York á föstudaginn. Hann var 35 ára þegar hann lést.

„Manni brá náttúrulega bara. Þetta var alveg hræðilegt og maður fer bara að hugsa um fjölskylduna hans. Það var alveg glatað að heyra þetta,“ sagði Halldór Garðar í samtali við Vísi.

Hann lék með Rochford heitnum hjá Þór tímabilið 2018-19. Liðið endaði í 6. sæti deildarinnar og sló Tindastól úr leik í eftirminnilegri rimmu í átta liða úrslitum úrslitakeppninnar, 3-2. Í undanúrslitunum tapaði Þór fyrir KR, 3-1.

Rochford var öflugur leikmaður en ekki síður litríkur karakter sem setti svip sinn á deildina hér heima. Hann var víðförull en auk þess að spila á Íslandi lék hann í Hollandi, Frakklandi, Kósovó, Ísrael, Englandi og Sviss. Rochford lék tvö ár með Globe Tech háskólanum og tvö ár með Farleigh Dickinson. Auk þess að spila með Þór spilaði hann til skamms tíma með Hamri í Hveragerði.

Var enn að spila

Halldór Garðar segist ekki hafa verið í miklu sambandi við Rochford eftir að leiðir skildu vorið 2019 en hann fylgdist þó með honum í gegnum samfélagsmiðla.

„Það var aðallega ef maður sá eitthvað á Instagram. Hann bjó bara í New York og var að vinna þar og var ennþá að spila körfu, ekki sem atvinnumaður en var eitthvað að sprikla allavega,“ sagði Halldór Garðar.

Hann lýsir Rochford sem fjörugum og hvetjandi einstaklingi.

„Hann er einn af þeim eftirminnilegri sem maður hefur verið með í liði. Það var alltaf þvílíkt líf og fjör í kringum hann. Hann var skemmtilegur karakter, mjög drífandi og gaman að vera í kringum hann. Það er mjög leiðinlegt að hann hafi kvatt svona ungur,“ sagði Halldór Garðar.

Gaf mikið af sér

Hann segir að Rochford hafi smollið vel inn í samfélagið í Þorlákshöfn.

„Hann var ótrúlega góð viðbót í samfélagið í Þorlákshöfn. Við vorum að þjálfa saman 10-11 ára krakka. Hann gaf alveg ótrúlega mikið af sér og var hérna bara alltaf tilbúinn að koma og dæma ef það vantaði eitthvað svoleiðis. Hann var mjög opinn karakter og drífandi,“ sagði Halldór Garðar.

Rochford tók flest fráköst allra í deildinni tímabilið 2018-19 (12,2) en skilaði einnig 19,1 stigi og 3,9 stoðsendingum. Halldór Garðar segir að það hafi verið gott að spila með Rochford sem hafi gert samherja sína betri.

„Hann var mjög óeigingjarn og mjög góður sendingamaður, með frábæra vinstri hönd sem var erfitt að stoppa. Hann var mjög viljugur að senda boltann og góður í því. Þannig að ef maður fann hann og hreyfði sig vel í kringum hann var hann alltaf að fara að verðlauna mann til baka,“ sagði Halldór Garðar.

Hvetjandi sama á hverju gekk

Tímabilið 2018-19 var mjög eftirminnilegt hjá Þór en endurkoma liðsins í frægum oddaleik gegn Stólunum á Sauðárkróki gleymist seint.

„Hann var náttúrulega risapartur af þessu með sínum óeigingjarna leikstíl. Hann var alltaf tilbúinn að hvetja mann áfram, sama hvernig gekk, og það var ótrúlegt hvað við vorum oft tuttugu stigum undir eða eitthvað og svo kom þvílík endurkoma,“ sagði Halldór Garðar.

Rochford var þekktur fyrir sósufagnið sitt en hann þóttist þá hræra í sósupotti. Halldór Garðar kann þó ekki söguna á bak við fagnið.

„Nei, en hann kallaði sig stundum kokkinn Kinu. Þetta var einhver brandari hjá honum. Hann var mikið að hræra í sósunni,“ sagði Halldór Garðar að lokum.