„Of mörg heimsku­leg mis­tök“

Norður-Írinn McIlroy vann mótið árið 2014 og ætlaði sér að vinna í annað sinn, rétt eins og hann gerði þegar hann varði Masters-titilinn sinn í apríl.

Honum gekk hins vegar afleitlega að fóta sig í gær, öfugt við Suber sem átti frábæran dag í sinni fyrstu ferð til Evrópu.

McIlroy hefur samtals unnið sex risamót en hann lék á 72 höggum í gær, eða tveimur höggum yfir pari, og hefur verk að vinna þegar hann leggur af stað í hring tvö núna klukkan 9:09 að íslenskum tíma, á Sýn Sport.

Hann fékk fjóra fugla en sex skolla, eftir að hafa til að mynda klikkað þrisvar á 120 sentímetra púttum, á holum 7-10, áður en hann fékk svo þrjá fugla og tvo skolla á par-5 holum á lokaþriðjungnum.

„Skollarnir tveir á par-5 holunum voru ekki frábærir og ég átti í vandræðum með að finna hraðann á flötunum á fyrstu tveimur holunum,“ sagði McIlroy sem ætti núna að hafa náð að venjast aðstæðum á Royal Birkdale-vellinum. Hann varð í 4. sæti þegar mótið fór þar fram árið 2017.

„Mér fannst ég komast á svolítið skrið en ég gerði of mörg heimskuleg mistök. En alltaf þegar ég gerði heimskuleg mistök þá náði ég sem betur fer í fugl til að halda mér inni í þessu.

Ég er ekki svo langt frá þessu. Vonandi fáum við betri aðstæður og flatirnar verða aðeins sléttari í morgunsárið,“ sagði McIlroy í gær.