Mirza Bulic yfir­gefur Kefla­vík og semur við Grinda­vík

Stærstu fréttirnar eru að Mirza Bulic, sem spilaði með Keflavík síðasta vetur, er búinn að skrifa undir hjá Grindavík en þá hefur Körfuknattleiksdeild Grindavíkur einnig endursamið við þá Daniel Mortensen, Val Orra Valsson og Nökkva Má Nökkvason. Allir skrifa þeir undir tveggja ára samning.

Mirza er 209 sentimetra öflugur kraftframherji sem átti flott tímabil í Bónusdeildinni með Keflavík. Þar skilaði hann að meðaltali 18 stigum, 9 fráköstum og 2,6 stoðsendingum í leik. Hann var einnig með 22,3 í framlag, náði sex tvöföldum tvennum og var lykilmaður í liði Keflavíkur.

„Mirza er leikmaður sem við höfum fylgst vel með. Hann hefur sýnt hvað hann getur í íslensku deildinni og við teljum að hann passi einstaklega vel inn í það lið sem við erum að byggja. Við hlökkum mikið til að fá hann til liðs við okkur,“ sagði Jóhann Þór Ólafsson, þjálfari Grindavíkur, í frétt á miðlum félagsins.

„Ég er virkilega spenntur að ganga til liðs við Grindavík og hlakka mikið til að koma til Íslands. Ég get ekki beðið eftir að spila fyrir framan ykkur og gefa allt sem ég á fyrir þetta lið. Gerum þetta að frábæru tímabili saman,“ sagði Mirza Bulic.

Mirza kemur í stað Jordan Semple sem samdi við lið Álftanes á dögunum. 

Það er einnig mjög sterkt að halda Daniel Mortensen sem missti af lokum tímabilsins vegna meiðsla en hefur spilað stórt hlutverk í liðinu þegar hann er heill.

„Mér hefur liðið einstaklega vel í Grindavík og það er eitthvað alveg sérstakt við að spila fyrir Grindavík og þetta samfélag. Við urðum Íslandsmeistarar á síðasta tímabili en ég á enn ólokið verkefni. Ég vil vinna titilinn aftur og færa bikarinn heim til Grindavíkur enn eitt árið,“ sagði Daniel Mortensen.