UEFA logar í ljósi á­forma Infantino: „Sál fót­boltans ekki til sölu“

The Times og Financial Times greindu fyrst frá áformum stjórnenda hjá FIFA sem hyggjast bjóða fjárfestum að eiga hlut, þó ekki stjórnarhlut, í nýju dótturfélagi FIFA sem ber heitið FIFA Forward Enterprise (FFE) sem muni „samþætta viðskipta- og viðburðastarfsemi sambandsins“.

Í yfirlýsingu FIFA um málið segir að þegar málið verði samþykkt sé gert ráð fyrir því að Thrive Eternal muni leiða fyrirhugaðan fjárfestingahóp FFE. Thrive er bandarískt fjárfestingafyrirtæki sem er stofnað af Joshua Kushner. Sá er bróðir Jared Kushner, tengdasonar Donalds Trump, Bandaríkjaforseta.

Náið samband Trump og Infantino hefur sætt gagnrýni í aðdraganda og í kringum nýafstaðið heimsmeistaramót sem fór að stærstum hluta fram í Bandaríkjunum.

Í yfirlýsingu FIFA kemur fram að Infantino og aðrir stjórnendur sambandsins muni koma að þróun verkefnisins en hvert hlutverk forsetans verður nákvæmlega fylgir ekki sögunni.

Infantino segir í yfirlýsingu FIFA um málið að allar aðildaþjóðir að sambandinu muni græða á þessu fyrirhugaða fyrirkomulagi. Öll aðildarsambönd að FIFA muni fá aðgang að allt að 20 milljónum dala,tvo og hálfan milljarð króna, í „einskiptis fé“ (e. one-off capital).

Í fréttum Times og Financial Times kemur fram að Infantino geti sjálfur grætt tugi milljónir dala á þessu fyrirkomulagi.

UEFA: Þetta fer yfir öll mörk

Knattspyrnusamband Evrópu, UEFA, gagnrýnir áætlanir FIFA harðlega í yfirlýsingu sem sambandið birti síðdegis.

Hætt sé við því að FIFA muni í samræmi við áætlanirnar stækka eigin mót, þétta enn frekar dagatal fótboltans sem muni draga úr vægi annarra keppna, til að mynda þeirra sem heyra undir UEFA, líkt og Meistaradeild Evrópu.

„Þetta fer yfir mörk sem stjórnunarstofnanir knattspyrnunnar ættu aldrei að fara yfir,“ segir í yfirlýsingu UEFA.

„UEFA tekur þetta afar alvarlega. Það sama ætti að eiga við um knattspyrnusambönd allra landa. Það sama á við um alla hagsmunaaðila sem láta sig framtíð íþróttarinnar varða,“ segir í yfirlýsingunni og beinir þar af leiðandi orðum sínum til KSÍ og annarra knattspyrnusambanda ríkja víða um heim.

„Sál og stjórnun knattspyrnunnar eru ekki eignir til að eiga viðskipti með - sérstaklega þar sem ekkert gagnsæi er um hverjir hagnast fjárhagslega. Enginn okkar á knattspyrnuna. Það er ekki FIFA að selja hana.“

Líklegt má þykja að málið verði til umræðu á næsta stjórnarfundi FIFA í haust. Vera má að áætlanir FIFA verði lagðar fyrir öll 211 aðildarríki á næsta allherjarþingi sambandsins í Marokkó í mars næstkomandi