Dag­skráin: Logi Berg­mann með þátt um Ein­vígið á nesinu

Í kvöld verður sýndur þáttur Loga Bergmanns Eiðssonar um góðgerðagolfmótið Einvígið á nesinu sem fór fram í þrítugasta sinn um verslunarmannahelgina. Þátturinn er sýndur á Sýn Sport Ísland og hefst klukkan 20.00.

Venju samkvæmt mættust þar nokkrir af bestu kylfingum landsins en að þessu sinni léku þeir í þágu Bergsins, sjálfstæðra, óhagnaðardrifinna samtaka sem veita ungu fólki gjaldfrjálsan stuðning vegna andlegrar líðanar og áskorana í daglegu lífi.

Logi Bergmann Eiðsson hefur margoft sett saman þátt um mótið þar sem hann fylgist með gangi mála og talar við kylfingana á meðan keppnin stendur yfir.

Meðal keppenda var Gunnlaugur Árni Sveinsson en hann tók þátt í Opna bandaríska risamótinu, US Open, í sumar og þykir eitt mesta efni sem íslenskt golf hefur eignast.

Fyrirkomulagið er með því sniði að sá fellur úr leik á fyrstu braut sem er fjærst holu eftir þrjú högg og tvö högg á annarri braut. Eftir það verður farið í hina hefðbundnu útsláttarkeppni, eða „shoot-out“, þar sem sá sem er með hæsta skor á viðkomandi braut fellur úr leik.