Ótíma­bært að hafa á­hyggjur af á­hrifum mögu­legs verk­falls á sjúkra­flug

Sumarleyfi hafi tafið viðræður en þær séu nú að fara í gang á ný. Ótímabært sé að hafa áhyggjur af áhrifum mögulegs verkfalls á sjúkraflug. 

Þetta segir Davíð Smári Jóhannsson, formaður samninganefndar Félags íslenskra atvinnuflugmanna gagnvart Norlandair. Hann bindur vonir við að fundað verði í deilunni í næstu viku.

Auk launa sé rætt um breytingar á vinnufyrirkomulagi og flugmenn Norlandair hafi mikinn áhuga á því að komast inn í fast vaktakerfi líkt og þekkist á spítölum og hjá slökkviliðum.

Í dag sé vinnuskrá gefin út með tveggja vikna fyrirvara og flugmenn viti ekki hvernig vinnu þeirra verði háttað lengra fram í tímann. Davíð segir að þetta reyni sérstaklega á fjölskyldufólk og flugmenn óski þess að fá meiri fyrirsjáanleika.

Aðspurður um gang viðræðna segir Davíð að „þær mættu ganga hraðar en það er allavega samtal í gangi.“

„Við funduðum síðast í byrjun júní og svo hafa aðeins tölvupóstar gengið á milli. Þannig að það er kannski ekki alveg stopp.“

Hátt í fimmtíu flugmenn

Kjarasamningar flugmanna og Norlandair hafa verið lausir frá 1. nóvember en félagið er með sjúkraflug, áætlunarflug og leiguflug.

„Norlandair sinnir mjög mikilvægu starfi uppi á Grænlandi, bæði fyrir vísindasamfélagið og danska herinn,“ segir Davíð. Norlandair og fyrirrennarar þess hafi til að mynda flogið fyrir danska herinn frá árinu 1975. Bæði hafi verið farið með hermenn og Danaprins.

Norlandair gerir út frá Akureyri og Reykjavík og starfa þar alls 46 flugmenn, að sögn Davíðs sem starfaði lengi fyrir félagið. Allir flugmennirnir séu undir í kjaraviðræðunum.

Davíð segir of snemmt að hafa áhyggjur af því að flugmenn sem sinni sjúkraflugi endi í verkfalli.

„Við erum ekki komnir til sáttasemjara enn þá, þannig að við erum ekki komin þangað og sjúkraflugið er náttúrulega neyðarflug. Þannig að ég held að það sé ekki tímabært að fara að óttast eitthvað um það. Alls ekki.“