For­ystu­menn láti stór orð falla sér og sínum mál­stað til fram­dráttar

Kristrún tilkynnti á dögunum að hún ætlaði að fara hringinn í kringum landið og bjóða fólki að hitta sig á svokölluðum hlustunarfundum. Það sé í þeim tilgangi að hlusta á væntingar, þrár og áhyggjur fólks í sambandi við atkvæðagreiðsluna um áframhaldandi aðildarviðræður við Evrópusambandið sem fram fer í lok ágúst.

Útlitið ekki eins svart og sumir vilja láta vera

Nú hefur henni orðið ljóst að þrátt fyrir að atkvæðagreiðslan sé stórt mál í hugum fólks sem „þjóðin tekur alvarlega og nálgast af ábyrgð — en þó ekki deilumál af því tagi að landsmenn láti tilfinningahitann bera sig ofurliði.“

Það virðist ekki sem menn eða fjölskyldur, heilu samfélögin eða þjóðin séu öll klofin í herðar niður af heift og æsingi, „eins og ýmsir foringjar og álitsgjafar vilja láta vera“.

Þá ítrekar hún að einhverjir forystumenn hafi látið stór orð falla, líklega í hita leiksins, með það fyrir augum að magna upp og ala á klofningi sem þeir telji að geti orðið sér og sínum málstað til framdráttar.

Undanfarin misseri hafa birst fréttir um að niðurstöður kannana sýni að það sé lítill sem enginn marktækur munur á þeim sem hyggjast kjósa já í ágúst og þeim sem ætla að haka við nei. Að mati stjórnmálafræðings sem rætt var við á dögunum bendir allt til þess að þátttakan sjálf muni skipta mestu máli í komandi þjóðaratkvæðagreiðslum. Yngra fólk hallist meira að já-inu en sé sömuleiðis talið ólíklegra til að mæta á kjörstað.

Tækifæri í því að ganga til samninga

Í ræðunni hamrar Kristrún á því að fólkið í landinu viti sínu viti og sé fullfært um að ræða málin af yfirvegun og taka eigin ákvörðun „án þess að láta villa um fyrir sér varðandi það um hvað er kosið, og án þess að láta skipa sér á bás í þessu máli af flokkspólitískum foringjum“.

Hún heitir því að treysta, virða og vinna með niðurstöðu þjóðarinnar í málinu en í hennar huga sé ljóst að það geti falist tækifæri í því á þessum tímapunkti að ganga til samninga um aðild að Evrópusambandinu.

„En ef fólkinu í landinu hugnast það ekki og vill ekki fá slíkan samning á borðið þá er betur heima setið en af stað farið,“ sagði hún í ræðunni.

Kristrún hefur undanfarið sætt gagnrýni fyrir að vera ekki nógu skýr í svörum og jafnvel ósamkvæm sjálfri sér, meðal annars frá Guðrúnu Hafsteindóttur formanni Sjálfstæðisflokksins.

Í myndbroti af Kristrúnu Frostadóttur frá árinu 2024, í aðdraganda síðustu þingkosninga, sem hefur verið mikið í dreifingu, sagði hún að afgerandi stuðningur þyrfti að vera við Evrópuvegferð. Nú er útlit fyrir að svo verði ekki ef marka má niðurstöður síðustu kannana.