Heims­meistarinn ó­vænt úr leik í fyrstu um­ferð

Heimsmeistaramótið í badminton er haldið í Nýju-Delí á Indlandi í ár og mætti ríkjandi heimsmeistari Yu Qi Shi Indverjanum Ayush Shetty. Þeir mættust fyrr á árinu í úrslitaleik Asíuleikanna þar sem Yu Qi Shi vann örugglega.

Annað var upp á teningnum í dag og var Shi brugðið eftir að hafa tapað fyrstu lotunni 21-14. Hann kom til baka og vann aðra lotu örugglega 21-13 og ljóst að úrslitin myndu ráðast í þriðju lotu.

Shetty var kominn með gott forskot í úrslitalotunni og útlitið orðið svart fyrir Shi þar sem staðan var orðin 17-6 fyrir Shetty en þá kviknaði á Shi. Shetty vildi halda forystunni og ná aðeins auðveldum stigum en það er erfitt gegn besta leikmanni heims.

Shi náði hægt og rólega að nálgast Shetty og var hann virkilega farinn að finna fyrir pressunni. Aðeins eitt stig var orðið á milli þeirra þar sem Shetty var 20-19 yfir en hann náði að vinna það stig og slá heimsmeistarann úr leik.

Eftir leikinn var Shetty himinlifandi með að hafa náð að vinna ríkjandi heimsmeistarann á heimavelli en þrátt fyrir að hafa unnið ber hann mikla virðingu fyrir Yu Qi Shi.

„Hann er alltaf rólegur. Hann sýnir ekki neinar tilfinningar og það gerir hann svo hættulegan þegar hann er að vinna upp forskot. Hann er svo rólegur að maður heldur að hann sé ekki undir neinni pressu og það sýndi sig í lokin þegar hann var að ná mér.

Shi Yu Qi er búinn að vera í heilt ár samfleytt sem efstui leikmaður á heimslista en hann komst fyrst efst á heimslistann árið 2024. Það er því gríðarlegt högg fyrir kappann að detta út í fyrstu umferð og ná ekki að gera atlögu að því að verja titilinn sinn.

Íslandsvinurinn og stærsta von Danmerkur unnu

Fleiri stór nöfn áttu leik í dag þar sem danska hetjan Anders Antonsen, sem er fjórði á heimslista, vann Dicky Dwi Pangestu örugglega í fyrsta leik. Antonsen hefur verið að glíma við meiðsli en hann reynir að hrista þau af sér á meðan mótinu stendur. Hann hefur verið stærsta nafn Danmerkur í badminton síðan Viktor Axelsen lagði spaðann á hilluna fyrr í ár.

Íslandsvinurinn Tien Chen Chou, sem er sjötti á heimslistanum, vann Clarence örugglega í sínum fyrsta leik. Chou vann Opna kínverska risamótið fyrr í sumar og stefnir á að halda góðu gengi. Milli keppna hefur hann nokkrum sinnum komið í heimsókn og þjálfað keppnishóp TBR þar sem hann deilir sinni reynslu. Hann er orðinn náinn félagi TBR félagsins og því í miklu uppáhaldi hjá íslenskum leikmönnum.