Meirihluti telur hitamet og gróðurelda vegna loftslagsbreytinga

Lovísa Arnardóttir skrifar 18. ágúst 2026 08:49

Slökkviliðsmaður berst við skógarelda í Vilarinho da Castanheira skóginum í Portúgal. Myndin er tekin í gær. Vísir/EPA

Um 82 prósent telja að hitamet og skógareldar í Evrópu séu að miklu leyti vegna loftslagsbreytinga. Töluverður munur er eftir kyni og afstöðu til stjórnmálaflokka. Þetta er niðurstaða könnunar Maskínu sem framkvæmd var í ágúst.

Gróðureldar hafa geisað víða um Evrópu í sumar og hvert hitametið fallið af öðru. Í tilkynningu um niðurstöður könnunarinnar frá Náttúruverndarsamtökunum Íslands segir að skógareldar muni hafa áhrif á loftslagsstefnu Evrópusambandsins og þó svo að Ísland sé ekki aðili að sambandinu sé Ísland þátttakandi í loftslagsstefnunni í gegnum EES-samninginn.

Ef litið er til ólíkra bakgrunnsbreyta þeirra sem svara könnunni má sjá að ögn fleiri sem yngri eru en 40 ára telja að hitamet og skógareldar séu að mjög eða frekar miklu leyti vegna loftslagsbreytinga og hlutfallið einnig hærra eftir því sem menntunarstig eykst. Þá er hlutfallið hærra hjá konum, 89,3 prósent, miðað við hjá körlum, 74,5 prósent. Sjá könnun hér.

Hlutfall þeirra sem telja skógarelda og hitamet að mjög eða frekar miklu leyti vegna loftslagsbreytinga. Maskína

Flestir, 47,4 prósent, segja hitamet og skógarelda tengjast loftslagsbreytingum að mjög miklu leyti en 34,2 prósent segja frekar miklu. Það eru svo 13,2 prósent sem segja frekar litlu og 5,3 prósent sem segja mjög litlu eða engu leyti.

Ólík afstaða eftir stjórnmálaflokkum

Afstaða fólks er nokkuð mismunandi eftir því hvaða flokk það ætlar að kjósa. Sem dæmi telja um 80 prósent kjósenda Vinstri grænna og Pírata að skógareldar og hitamet tengist loftslagsbreytingum að mjög miklu leyti en aðeins 9,8 prósent kjósenda Miðflokksins. Þar segir meirihluti annaðhvort að skógareldarnir og hitametið séu að frekar miklu leyti (36,5 prósent) eða að frekar litlu leyti (32,4 prósent) vegna loftslagsbreytinga. Hæsta hlutfall þeirra sem telja hitamet og skógarelda vegna loftslagsbreytinga að mjög litlu eða engu leyti vegna loftslagsbreytinga eru 21,4 prósent kjósenda Miðflokksins.

Hér má sjá mun eftir helstu bakgrunnsbreytum. Maskína

9,7 prósent kjósenda Sjálfstæðisflokksins eru sammála því og 8,1 prósent kjósenda Flokks fólksins. Um 28 prósent kjósenda Sjálfstæðisflokksins segja þó að þau telji hitamet og skógarelda að mjög miklu leyti vegna loftslagsbreytinga og 41 prósent þeirra frekar miklu leyti.

Spurt var í könnuninni: Að hve miklu eða litlu leyti telur þú að hitamet og útbreiddir skógareldar í Evrópu tengist loftslagsbreytingum? Könnunin fór fram frá 7. til 11. ágúst 2026 og voru svarendur 1.205 talsins.

Gróðureldar Loftslagsmál Evrópusambandið EES-samningurinn

Tengdar fréttir

Tveir látnir í gróðureldum í Grikklandi

Tveir létust og mörg hundruð manns voru flutt á brott af grísku eyjunni Salamis sem er nærri höfuðborginni Aþenu en tveir gróðureldar kviknuðu „nánast samtímis“ eða um klukkan 14:40 á staðartíma og svo tuttugu mínútum seinna. Fyrri eldurinn kviknaði á suðurströnd eyjunnar og að sögn slökkviliðsyfirvalda í Grikklandi breiddist hann gríðarlega hratt út vegna hvassviðris.

16. ágúst 2026 18:14

Gróður brennur beggja vegna Ermarsunds

Slökkviliðsmenn á Englandi og í Frakklandi berjast nú við fjölda gróðurelda í enn einni hitabylgjunni sem gengur yfir Evrópu. Hiti nálgaðist fjörutíu gráður í London í gær.

14. ágúst 2026 09:54

Heitustu sumarmánuðir í Vestur-Evrópu í sögunni

Meðalhiti í Vestur-Evrópu í júní og júlí var sá hæsti sem mælst hefur og sló fjögur ára gamalt met. Þúsundir dauðsfalla hafa verið rakin til hitabylgna þar frá því í vor.

10. ágúst 2026 07:36

Mest lesið

Fleiri fréttir