Hótar að flytja aftur til Fær­eyja gangi Ís­land í ESB

„Spurningin er hvers vegna við ætlum að horfa til ESB. Hvers vegna horfum við ekki á ástandið sem er hér á landi? “ spyr Jógvan en rætt var við hann í kvöldfréttum Kringvarpsins.

Ísland sé rík þjóð en hér séu líka háir vextir og dýrt að lifa. Það megi vel vera að aðild Íslands að Evrópusambandinu tryggi Íslandi stöðugri efnahag og lægri vexti en spyr hvers vegna þurfi að leita út fyrir landsteinana til þess að leysa slík vandamál.

Þrátt fyrir afstöðu sína segir Jógvan að væri hann með kosningarétt segði hann já í þjóðaratkvæðagreiðslunni á laugardaginn næsta. „Ég hefði sagt já, ég vil gjarnan skoða hvað þeir geta boðið okkur,“ segir Jógvan í samtali við Hönsu Hansen, fréttamann Kringvarpsins, og bætir við:

„En ef það kemur að því að við förum í ESB, þá kem ég heim aftur til Færeyja strax, því ég ætla mér ekki að vera þar. Það sem ég segi er kannski svolítið þröngsýnt en ég hef engan áhuga á að láta einhvern í Brussel taka ákvarðanir fyrir mig. Alls ekki.“

Jógvan er ekki með kosningarétt á Íslandi og kýs því ekki um hvort að Ísland eigi að taka upp aðildarviðræður við Evrópusambandið að nýju þann 29. ágúst.