Heims­höfin aldrei heitari

Athuganir evrópsku loftslagsstofnunarinnar Kópernikusar var meðalyfirborðshiti heimshafanna 21,1 gráða á Celsíus á laugardag. Hann hefur ekki mælst hærri frá því að gervihnattamælingar hófust undir lok áttunda áratug síðustu aldar, að því er kemur fram í frétt The Guardian.

Yfirleitt nær sjávarhiti á heimsvísu hámarki í mars og apríl undir lok sumars á suðurhveli en umtalsvert meira hafsvæði er á suðurhveli en norðurhveli.

El niño-veðurfyrirbrigðið í Kyrrahafi er sagt magna upp hitann í hafinu. Fyrirbrigðip byrjaði að myndast fyrra á þessu ári. Veðurfræðingar hafa varað við að það gæti verið óvenjulega sterkt á þessu sinni.

„Metið er annað teikn um að það sé vaxandi álag á hafinu. El niño bætir við hita í kerfið en hann gerir það ofan á áratugi af manngerðri hlýnun. Afleiðingarnar eru þegar greinilegar: hitabylgjudagar í hafinu á heimsvísu hafa rúmlega þrefaldast frá byrjun 10. áratugsins,“ segir Samantha Burgess frá Kópernikusarstofnuninni.

Hlýindi í hafinu þenja sjóinn út sem eykur hættu á sjávarflóðum í strandbyggðum. Þau fóðra einnig veðuröfgar eins og storma og aftakaúrkomu.

Áætlað er að heimshöfin hafi drukkið í sig um níutíu prósent þeirrar umframorku sem hefur haldist við yfirborð jarðar vegna aukinna gróðurhúsaáhrif lofthjúpsins af völdum athafna manna. Þau hafa einnig tekið við stórum hluta þess koltvísýrings sem menn hafa spúð út í andrúmsloftið frá iðnbyltingu þar sem hann veldur súrnun sjávar.