Serena Williams snéri aftur á Opna banda­ríska risamótið og lék með Alcaraz

Nýtt fyrirkomulag á tvenndarleik á Opna bandaríska risamótinu í tennis var fyrst leikið á síðasta ári. Þá var keppnin færð vikuna fyrir einliðaleikskeppnina og er keppnin blanda af einliðaleiksspilurum sem eru hæstir á styrkleikalista og síðan eru keppendur valdir í mótið.

Þetta nýja fyrirkomulag var leikið í annað skipti í vikunni þar sem keppni hófst á þriðjudaginn. Tvenndarleiksparið sem vakti mesta athygli var lið Serenu Williams og Carlos Alcaraz.

Bæði að snúa aftur eftir mislanga bið

Serena Williams er að snúa aftur á Opna bandaríska risamótið í fyrsta skiptið síðan árið 2022 þegar hún gaf það út að hún ætlaði að leggja spaðann á hilluna. Síðan þá hefur hún haldið sig frá tennis þangað til á Wimbledon-risamótinu í sumar þegar hún snéri aftur í einliðaleik. Þar meiddist hún í fyrsta leik og átti erfitt með að halda áfram keppni. Hún ætlar þó ekki að spila einliðaleik á Opna bandaríska risamótinu í ár. Hún mun þó spila með systur sinni, Venus Williams, í tvíliðaleik.

Carlos Alcaraz er að snúa aftur á tennisvöllinn eftir meiðsli en hann spilaði síðasta keppnisleikinn sinn í apríl. Eftir fyrsta leikinn sem Alcaraz og Williams unnu sagðist Alcaraz hafa verið mjög stressaður. Hann klúðraði fyrstu tveim uppgjöfunum sínum en því lengur sem hann var inni á vellinum því betur leið honum. Í leiknum brostu þau bæði út að eyrum og voru greinilega að njóta þess að spila hvort með öðru fyrir framan þá 15.000 áhorfendur sem voru að hvetja þau áfram.

„Ég er að spila með hinni einu sönnu Serenu Williams, hvernig er annað hægt? Ég verð bara að njóta og ég reyni að gera hlutina sem hún segir mér að gera,“ sagði Alcaraz í viðtali milli setta í fyrsta leiknum.

Alcaraz ætlar að verja titilinn sinn

Alcaraz og Williams unnu fyrsta leikinn sinn en náðu ekki að vinna seinni leikinn og duttu því út í 8-liða úrslitum. Þau voru þó bæði sátt með að hafa snúið aftur á völlinn og virtust njóta þess að spila fyrir framan áhorfendurna í New York sem voru mættir að styðja þau. Williams er ekki búin að útiloka það að spila á fleiri mótum í einliðaleik og getur nýtt þessa reynslu í að gera sig klára í það.

Carlos Alcaraz gaf það út í síðustu viku að hann tæki þátt í Opna bandaríska risamótinu og ætlaði að verja titilinn sinn. Hann missti af bæði Opna franska risamótinu og Wimbledon-risamótinu vegna meiðsla.