Hadjar frá í aðra keppni

Hefð er fyrir því að eins mánaðar sumarfrí sé haldið í ágúst og koma flestir ökumenn endurnærðir eftir það og klárir í seinni hluta tímabilsins. Það gerðist þó ekki fyrir Isack Hadjar ökumann Red Bull þar sem hann fór á boxæfingu í sumarfríinu sínu sem endaði með því að hann brákaðist á úlnlið.

Hann gat ekki verið með í hollenska kappakstrinum sem var haldinn fyrir tveimur vikum en Red Bull gerði ráð fyrir að Hadjar yrði klár fyrir ítalska kappaksturinn sem er um helgina. Hadjar reyndist ekki hafa jafnað sig nógu hratt og þarf því að sitja á hliðarlínunni annan kappaksturinn í röð.

Liam Lawson, ökumaður RB, keyrði Red Bull-bíl Hadjar í hollenska kappakstrinum í fjarveru hans og mun gera það aftur í ítalska kappakstrinum. Lawson endaði í sjöunda sæti hollenska kappaksturisins sem verður að teljast fínasti árangur í bíl sem hann er óvanur.

Á meðan Lawson hefur verið að keyra fyrir Red Bull hefur Yuki Tsunoda keyrt RB-bílinn hans Lawson. Tsunoda var grátlega nálægt því að fá stig í hollenska kappakstrinum en hann endaði keppnina í ellefta sæti. Hann mun þó fá annað tækifæri í ítalska kappakstrinum á meðan Lawson keyrir fyrir Red Bull.

Red Bull beið með að taka ákvörðun um Hadjar eins lengi og mögulegt var. Í dag virðist það hafa komið í ljós að Hadjar væri ekki búinn að ná sér fyrir föstudaginn.

Keppt á nýrri braut eftir Ítalíu

Spænski kappaksturinn fer fram vikuna eftir ítalska kappaksturinn og vonast Red Bull-liðið til þess að Hadjar verði orðinn ökufær þá. Liðið vill þó ekki taka óþarfa áhættu og liðið ætlar aðeins að leyfa honum að keyra ef hann er heill heilsu.

Spænski kappaksturinn mun fara fram á nýrri braut sem er búið að byggja á götum Madridar. Mikil spenna er fyrir glænýrri braut og þurfa ökumenn að vera fljótir að læra á hana.