Á spítala eftir hræði­legt brot: „Þetta er morð­til­raun“

Ajax greinir frá því á miðlum félagsins í dag að Bouwman hafi orðið fyrir þónokkrum mismunandi meiðslum eftir samstuðið við van Bommel í gær. Þar á meðal sé hann með marið bringubein og mar á lungum.

Van Bommel fór sérlega harkalega í Bouwman, alltof seint, með skoppandi bolta. Allt sauð upp úr á vellinum og leikmenn liðanna tókust á.

Van Bommel er sonur Marks van Bommel, fyrrverandi leikmanns PSV, Barcelona, Bayern Munchen og AC Milan.

Sá var mikill harðhaus, talinn grófur á velli sem djúpur miðjumaður en sonurinn, Ruben van Bommel, sem leikur sem kantmaður, hefur síður verið talinn til grófra leikmanna.

Brot hans í gær hefur hins vegar vakið hörð viðbrögð og ekki síst vegna þess að myndbandsdómarar ákváðu ekki að senda dómara leiksins í skjáinn til að skoða möguleika á rauðu spjaldi.

Van Bommel yngri slapp með skrekkinn með gult spjald og kláraði leikinn, annað en fórnarlambið Bouwman, sem fór beinustu leið á sjúkrahús þar sem hann dvelur enn.

Ákvörðunin að reka van Bommel ekki af velli hafði líklega sín áhrif, þar sem hans lið PSV vann 3-1 sigur á Ajax í leiknum.

Hollenski sjónvarpsmaðurinn Hugo Borst sagði í útsendingu leiksins í gær: „Þetta er morðtilraun.“

Ekki liggur fyrir hvort aganefnd hollenska knattspyrnusambandsins muni eða hafi heimild til þess að dæma van Bommel í bann vegna málsins.

Myndskeið af brotinu má sjá í spilaranum.