Reiðar­slag, gríðar­leg von­brigði og „efna­hags­legt flanerí“

Daði Már Kristófersson kynnti fjárlagafrumvarpið fyrir næsta ár í morgun. Þar eru meðal annars felldar niður ívilnanir á virðisaukaskattheimtu á baðlónum auk þess sem kynnt var til sögunnar ný gjaldtaka á ferðamannastöðum. Ráðherrann segir gjaldtökuna fela í sér að erlendir ferðamenn verði rukkaðir um sérstakan aðgöngumiða. Jóhannes Þór Skúlason framkvæmdastjóri Samtaka í ferðaþjónustu er vonsvikinn en rætt var við hann í hádegisfréttum Bylgjunnar.

„Það er ekkert hægt að lýsa þessu sem öðru en reiðarslagi fyrir atvinnugreinina í heild. Þarna erum við með 22,6 milljarða af nýjum það sem kallað er „tekjuöflunaraðgerðum,“ það er að segja bara skattahækkunum í heildina í frumvarpinu og þar af á um helmingurinn að koma frá ferðaþjónustu og ekki bara ferðamönnunum eins og þið segið heldur mun stór hluti af þessu koma einfaldlega innanúr fyrirtækjunum meðal annars vegna þess hve fyrirvarinn er lítill og það er búið að selja langt inn á næsta ár. Það er erfitt að lýsa þessu öðruvísi heldur en bara gríðarlegum vonbrigðum og efnahagslegu flanerí ef ég á að segja alveg eins og er.“

Ferðaþjónustan hafi boðið ríkisstjórninni upp á virkt og jákvætt samtal um uppbyggilegar leiðir til þess að skila hærri tekjum úr greininni í ríkiskassann. Þar séu ýmsar aðferðir til sem séu vel þekktar og í samræmi við atvinnustefnu ríkisstjórnarinnar um verðmætasköpunaraukningu.

„Og geta skilað átta til níu milljörðum sem þarna eru sett og meira til en þá verður að horfa til þess hvernig er hægt að stækka þessa köku, hvernig er hægt að sjá til þess að verðmætaaukning og samkeppnishæfni skili sér til almennings í landinu. Og það er hægt og það eru bara gríðarleg vonbrigði að sjá þetta sett fram á þennan hátt með þessari skammtímahugsun eins og gert er þarna í svona gríðarstórum tölum.“

Einhverjir hugsa kannski að fyrirtæki í ferðaþjónustu græði nægan pening, þau gætu kannski bara tekið þetta á sig?

„Það er bara rangt, því miður. Ég bendi bara á að heildarafkoma greinarinnar eftir skatta árið 2024 eru um tuttugu milljarðar króna. Þarna á að sækja níu milljarða króna. Það jafngildir um það bil helmingnum af allri afkomu greinarinnar, þannig þessar tölur eru ekkert smáræði. Þetta er ekkert eitthvað sem maður grípur. Þetta er eins og ef við erum með heimilisbókhald þar sem við fáum útborgað 300 þúsund kall og ríkið ætlar að taka síðan 150 þúsund kall í viðbót þegar búið er að taka skatta. Það sér hver maður að þetta er ekki skynsamleg ráðstöfun inn í framtíðina.“

Aðrar leiðir séu færar. Meðal annars að að auka nýtingu utan háannatíma, á veturna um tíu prósent.

„Þá skilar það þessum átta til níu milljónum í ríkissjóð í skatttekjur en það tekur tíma að byggja það upp og því miður virðist bara vera horft á skammgóðan vermi þegar kemur að því hvernig ríkisstjórnin nálgast ferðaþjónustuna og það eru gríðarleg vonbrigði.“