Sex­tán ís­lensk mörk í Meistara­deildinni

Melsungen vann sterkan 33-31 sigur á Vardar frá Norður-Makedóníu. Þeir þýsku voru með yfirhöndina lengst af og sigurinn ekki í mikilli hættu á lokakaflanum þrátt fyrir tveggja marka muninn.

Markaskorið var einkar vel dreift í liði Melsungen þar sem línumaðurinn Johannes Golla var markahæstur með fimm mörk en Reynir Þór Stefánsson skoraði fjögur mörk úr sex skotum úr hægri skyttunni.

Í D-riðli vann Sporting öruggan tíu marka sigur, 43-33, á GOG frá Danmörku í Lissabon. Martim Costa var markahæstur á vellinum með ellefu mörk fyrir heimamenn en Færeyingurinn Óli Mittún skoraði átta fyrir GOG.

Orri Freyr Þorkelsson skoraði fjögur mörk úr fimm skotum úr vinstra horninu fyrir Sporting.

Fyrr í dag var Íslendingalið Kristianstad í eldlínunni í D-riðlinum er það heimsótti ungverska stórveldið Pick Szeged. Þeir ungversku voru of stór biti fyrir sænska liðið og unnu öruggan ellefu marka sigur, 42-31.

Einar Bragi Aðalsteinsson var markahæstur hjá Kristianstad með fjögur mörk og lagði einnig upp sex. Andri Erlingsson og Baldur Fritz Bjarnason skoruðu tvö mörk hvor.

Ólafur Andrés Guðmundsson kom ekki við sögu hjá Kristianstad í kvöld.

Í A-riðli vann Fucshe Berlín 44-33 sigur á Partizan í Belgrað og í E-riðli vann Montpellier 27-23 útisigur á Dínamó í Búkarest.