Viktor skoraði í fjórða sigrinum í röð

Viktor Bjarki byrjaði fremstur er FCK fékk Horsens í heimsókn á Parken í Kaupmannahöfn í dag og þá var landsliðsmaðurinn Guðlaugur Victor Pálsson í bakverðinum hjá nýliðum Horsens.

FCK komst yfir eftir aðeins sjö mínútna leik þökk sé marki sænska bakvarðarins Felix Bejimo og leiddi 1-0 í hléi.

Viktor Bjarki skoraði svo þegar aðeins fjórar mínútur voru liðnar af síðari hálfleiknum með laglegu skoti úr teignum. Það dugði FCK fyrir 2-0 sigri.

FCK var að vinna fjórða leikinn í röð og er með 21 stig á toppi deildarinnar eftir átta leiki, sex stigum á undan Midtjylland sem á leik inni.

Horsens er um miðja deild, með 10 stig í sjöunda sæti.