Fimm nýir í stjórn Ungs jafnaðarfólks

Í stjórn sitja nú þau Jóhannes Óli Sveinsson, forseti Ungs jafnaðarfólks, Egill Ö. Hermannsson, stjórnmálafræðingur, Jakob Beck, forseti Framtíðarinnar í MR, Kjartan Helgi Guðmundsson, varaforseti SHÍ, Lilja Hrönn Önnudóttir Hrannarsdóttir, laganemi, Orri Thor Eggertsson, varaforseti SFHR, Sif Káradóttir, lögfræðinemi, og Soffía Svanhvít Árnadóttir, nemi í félagsráðgjöf og leikskólastarfsmaður.

Í tilkynningu frá Ungu jafnaðarfólki kemur fram að á landsþingi þess hafi það kallað eftir því að ríkisstjórnin leiddi þjóðarátak í velferð barna og ungmenna. Meirihlutinn í Reykjavíkurborg var einnig hvattur til að afturkalla niðurskurð í þjónustu við börn og ungmenni og leggja sitt af mörkum til að bæta lýðheilsu.

„Á síðasta þingvetri hófst vinna við fyrstu ungmennastefnu Íslands, það er stórt skref en henni verða líka að fylgja aðgerðir. Ungt jafnaðarfólk hvetur ríkisstjórnina til að klára þá stefnu og á grundvelli hennar leiða samtal um þjóðarátak í lýðheilsu barna,“ segir í ályktun sem samþykkt var á fundinum.

Kristrún Frostadóttir forsætisráðherra og Logi Einarsson menningar-, nýsköpunar- og háskólaráðherra sátu fyrir svörum í ráðherragrilli og hélt Ragna Sigurðardóttir, fyrrum forseti UJ og þingmaður Samfylkingarinnar, hátíðarræðu þingsins.

Jóhannes Óli veitti Kára Sigurðssyni félagshyggjuverðlaun Ungs jafnaðarfólks 2026 fyrir hans framlag í þágu félagsmiðstöðvastarfs og lýðheilsu ungmenna.