„Það er smá töffari í mér“

Sigríður Margrét er fimmtíu ára gömul og sækir tískuinnblásturinn meðal annars til kvenna í kringum sig. Sömuleiðis er hún dugleg að lesa tískutímaritið Vogue og taka púlsinn á stefnum og straumum í tískunni. Hún var dugleg að prófa sig áfram með hinar ýmsu tískutilraunir á yngri árum en hefur í dag algjörlega fundið sinn stíl og er alltaf samkvæm sjálfri sér í klæðaburði.

Hvað finnst þér skemmtilegast við tískuna?

Hún gerir lífið fallegra, hún byggir á hönnun og ég hef mjög gaman af því hvernig fólk notar hönnun til þess að tjá sig í víðasta skilningi.

Hver er uppáhalds flíkin þín og af hverju?

Pels sem ég erfði eftir ömmu mína og nöfnu en hann hefur tilfinningalegt gildi. Ég var mjög ung þegar ég var farin að máta skóna hennar og man mjög vel eftir þessum pels í fataskápnum. Hún notaði hann sjaldan en passaði vel upp á hann.

Eyðirðu miklum tíma í að velja föt hverju sinni?

Nei, ekki almennt en ég á það til að gefa mér góðan tíma þegar ég fæ frí til þess að máta mismunandi samsetningar í fataskápnum mínum.

Hvernig myndirðu lýsa stílnum þínum?

Stílhreinn, ég vel að vera virðuleg starfsins vegna en það er líka smá töffari í mér, ég hef mjög gaman af því sem er aðeins öðruvísi.

Hefur stíllinn þinn breyst mikið í gegnum tíðina og hvernig þá?

Eftir því sem lífsreynslan verður meiri þá eykst samhliða áherslan á gæði og vandaða hönnun, en það er líka gott að muna að gæði og verð fara ekki alltaf saman.

Hvaða flíkur myndirðu segja að einkenni stílinn þinn þessa dagana?

Ég byrjaði að vinna hjá Bláa Lóninu á þessu ári og það er mjög skemmtilegt að uppgötva að litapallettan í fataskápnum mínum passar mjög vel við einkennisliti félagsins. Um þessar mundir er ég að blanda saman fötum sem henta á skrifstofuna og í ferðalög á þá einstöku áfangastaði sem eru innan Bláa Lóns samstæðunnar. Ég er því búin að vera góður viðskiptavinur hjá 66°Norður að undanförnu.

Nýturðu þess að klæða þig upp?

Já, það er fátt skemmtilegra en að klæðast fallegum kjól í fyrsta sinn.

Hvað skiptir þig mestu máli í klæðaburði?

Fötin mín, alveg eins og orðin sem ég nota, verkefnin sem ég vinn og fólkið sem ég hef í kringum mig, endurspegla viðhorf mitt til lífsins. Ég vil nýta lífið til þess að eiga góð viðskipti, góð samskipti og ég hef virkilega gaman af því sem er fallegt.

Hvaðan sækirðu innblástur í tískunni?

Það eru tvö tímarit sem ég kaupi, Vogue og Harvard Business Review, það jafnast ekkert á við það að fletta septemberútgáfunni af Vogue árlega. Ég fylgist líka með tísku á íslensku miðlunum og á samfélagsmiðlum en svo hef ég líka mjög gaman af því að fylgjast með öðru fólki. 

Ég á yndislegar systur, mágkonur, frænkur, tengdadóttur og viðskiptafélaga sem veita mér innblástur í hvert sinn sem ég sé þær.

Ertu með einhver boð og bönn þegar það kemur að klæðaburði?

Nei, mér finnst skipta mestu máli að klæða mig eftir aðstæðum, það er mjög misjafnt hvað er viðeigandi. Á Íslandi verðum við líka að klæða okkur á þann hátt að við getum notið þeirrar einstöku náttúru sem landið okkar hefur að bjóða.

Áttu eitthvað eftirminnilegt tískuslys og hvernig var það?

Ekki svo ég muni. 

Þegar ég var ung og nýkominn út á vinnumarkaðinn að námi loknu þá var mér kurteislega bent á að það væri ekki viðeigandi að vera í opnum skóm, ég þyrfti að leggja áherslu á að klæða mig á þann hátt að ég virkaði eldri ef ég vildi að fólk hlustaði á mig. Ég hlýddi þessum ráðum.

Spilar álit annarra eitthvað hlutverk í þínu fatavali?

Já, ég vinn við að eiga samskipti við annað fólk og er mjög meðvituð um að samskipti snúast ekki bara um það sem er sagt, heldur líka um það hvernig fólk kemur fram og hverju það klæðist. 

Að öðru leyti er ég lítið upptekin af því hvað öðrum en þeim sem mér þykir vænt um finnst um minn fatastíl. Ég var mjög dugleg að gera tískutilraunir þegar ég var ung en það fer minna fyrir þeim núna.

Hver er eftirminnilegasta flík sem þú hefur klæðst og af hverju?

Nýverið fór ég í árgangagöngu með æskuvinkonum mínum á Ljósanótt í Reykjanesbæ og þar var ég með derhúfu merkta 1976 og í neongrænum bol sem á stóð „Eru ekki allir 76ý?“ Þetta var bæði eftirminnilegt og skemmtilegt.

Hvað finnst þér heitast í tískunni fyrir haustið?

Það er alveg ljóst að brúnleitir og vínrauðir tónar, rúskinn og kögur eru allsráðandi þessa dagana. Haustinu fylgja alltaf fallegar hlýjar peysur og leðurbuxur, á Íslandi eru góðar leðurbuxur nauðsyn. 

Ég lét loksins verða af því um daginn að kaupa mér skó frá KALDA og ég er yfir mig hrifin, ekki bara vegna þess hversu fallegir þeir eru heldur líka vegna þess hversu gott er að ganga í þeim. Svo er ég ánægð með að heilbrigði og vellíðan sé í tísku, hvort sem við erum að tala um líkamann, fjárhaginn, samskipti, eða umhverfið.

Býrðu yfir einhverju góðu ráði þegar það kemur að tísku?

Vertu þú sjálf og mundu að heilsa og vellíðan er nýi lúxusinn, það er ekkert mikilvægara en heilbrigði og það er töff.