HSÍ gat ekki styrkt Sérsveitina: Fékk yfir þrjár milljónir í fyrra

Sérsveitin tilkynnti í dag að hún yrði ekki á HM karla í Þýskalandi í janúar vegna kostnaðar og miðamála. Ellefu meðlimir verða hins vegar á EM kvenna í Rúmeníu, á þremur leikjum Íslands í byrjun desember.

Sérsveitin hefur notið fjárstuðnings öflugra fyrirtækja sem og frá HSÍ til þess að komast á stórmót síðustu ára og ýtt þar undir stemningu þúsunda Íslendinga sem vakið hafa mikla athygli með stuðningi sínum. Nú virðast fyrirtækin halda að sér höndum og það sama á við um HSÍ sem á síðasta ári styrkti sérsveitina um meira en þrjár milljónir króna.

„HSÍ stendur nú frammi fyrir krefjandi fjárhagsstöðu sem hefur kallað á verulegan niðurskurð í starfsemi og verkefnum allra landsliða. Á stórmótum yngri landsliða síðastliðið sumar þurfti til að mynda að draga verulega úr mannafla í kringum liðin. Aðeins fjórir starfsmenn fylgdu hverju landsliði, á sama tíma og sambærileg landslið mótherja okkar hafa í mörgum tilvikum allt að níu starfsmenn með sér,“ segir í yfirlýsingu á vef HSÍ. Sambandið hefur um árabil glímt við mikla fjárhagserfiðleika.

„Þessi staða kallar á erfiðar ákvarðanir og forgangsröðun. HSÍ sér sér því miður ekki fært að styrkja Sérsveitina á næstu tveimur stórmótum, EM kvenna í desember og HM karla í janúar.

Undanfarin ár hefur HSÍ stutt við starf Sérsveitarinnar og nam styrkur sambandsins til sveitarinnar á fjórðu milljón á síðasta ári. Það endurspeglar þá miklu þýðingu sem við leggjum í stuðning þeirra og framlag til íslensks handbolta. Núverandi fjárhagsstaða gerir okkur hins vegar ekki kleift að halda þeim stuðningi áfram að svo stöddu,“ segir þar einnig.