Finnur til með Arnari

Fjórir leikmenn í A-landsliði karla í fótbolta fóru út á lífið á spilavíti og höfðu áfengi við hönd eftir leik við Búlgaríu á Laugardalsvelli á laugardagskvöldi fyrir tveimur vikum síðan.

Arnar Gunnlaugsson, landsliðsþjálfari karla í fótbolta, svaraði fyrir agabrotin í löngu máli við Vísi í gær þar sem hann fordæmdi hegðunina og sagði leikmennina ekki aðeins hafa brugðist sér heldur sjálfum sér og þjóðinni allri.

Örfáir aðilar hér á landi þekkja hvernig það er að stýra landsliði í stóru boltaíþróttunum með athyglinni og pressunni sem því fylgir. Snorri Steinn var því spurður út í málið er hann opinberaði landsliðshóp í handboltanum í gær

Fannst þú eitthvað til með Arnari Gunnlaugssyni að þurfa að takast á við svona mál?

„Já, ég geri það. Ég gluggaði aðeins í viðtalið sem þið tókuð við hann og, já, auðvitað fann ég aðeins til með honum. Því að ég tek undir það sem hann sagði að á að vera bara common sense fyrir leikmenn sem spila fyrir íslenska landsliðið í handbolta eða fótbolta að, það eru bara ákveðnar kröfur sem eru gerðar til þín og ákveðnir hlutir sem þú getur bara ekki leyft þér. Þannig að ég skil vel að þetta séu mikil vonbrigði fyrir hann,“ segir Snorri Steinn.

Hefur þú þurft að takast á við eitthvað svona mál?

„Nei.“

Ekkert vesen og engar reglur í handboltanum

Fótboltalandsliðið var í sérstaklega löngum leikjaglugga og Arnar hafði orð á því að það hefði tekið á andlega. Til samanburðar er handboltalandsliðið iðulega saman í meira en mánuð er liðið býr sig undir stórmót frá því í lok desember og langt fram eftir janúar, sem fer eftir því hvað liðið nær langt.

Þrátt fyrir það segist Snorri ekki hafa þurft að takast á við nein agamál líkt og það sem Arnar svaraði fyrir hjá Vísi í gær.

Aðspurður um hvort það séu sérstakar agareglur hjá handboltalandsliðinu eða hvort það sé meira common sense, eins og Snorri orðar það sjálfur, segir hann:

„Ég hugsa það þannig. Ég er ekkert með þetta skrifað á blað sem ég sendi þeim, eitthvert regluverk frá mér hvernig menn eiga að haga sér í landsliðsverkefni. Enda hef ég ekki þurft að taka á svona hlutum,“

„Mín upplifun af þessum drengjum er bara þeir eru gríðarlega fagmannlegir og miklir atvinnumenn og við höfum ekki lent í þessu, að mér vitandi hingað til, þannig að ég er ekkert að fara út úr þessu, er ég ekki að fara að senda þeim einhverja reglubók. Ég treysti þeim og þangað til annað kemur í ljós þá er það bara þannig.“

Ummæli Snorra má sjá í spilaranum.