Sundrung sjálfstæðismanna

"Ég túlka þetta sem árás Valhallar á sjálfstæðismenn í Kópavogi," segir Gunnar I. Birgisson, formaður bæjarráðs Kópavogs og verðandi bæjarstjóri, en borgarráð Reykjavíkur féllst ekki á að leyfa Kópavogsbæ að leggja vatnslögn frá Vatnsendakrikum á borgarráðsfundi á þriðjudag. Borgarráð álítur að svæðið tilheyri Reykjavík. "Við erum að bora fyrir vatnsveitu í Vatnsendakrika sem er í lögsögu Kópavogs og þurfum að leggja vatnið um tvo kílómetra yfir land borgarinnar og þeir hafna því," segir Gunnar. Hann segir Reykjavík þurfa að fara yfir lögsögu Kópavogs vegna Hellisheiðarvirkjunnar og því finnst honum höfnunin koma spánskt fyrir sjónir. Hann trúi öllu upp á R-listann en eigi erfitt með að trúa þessu upp á sjálfstæðismenn í borginni. Þá segir hann koma á óvart að Vilhjálmur Þ. Vilhjálmsson, oddviti sjálfstæðismanna í Reykjavík, sem var aðstoðarframkvæmdastjóri flokksins, skuli greiða gegn vatnslögninni. "Ég held að verið sé að stuðla að sundrungu Sjálfstæðisflokksins. Við munum fara með þetta fyrir dómstóla. Landslögin segja að hver sem er hafi heimild til að leggja vatnslögn yfir land annarra," segir Gunnar. Því segist hann ekki skilja að borgarráð skuli gera slíkt þar sem það muni einungis kosta tafir í nokkra mánuði á meðan málið fer fyrir dómstóla. "Þó að það sé gott veður og framtíðin blasi við Kópavogi þá blasir hún ekki við Sjálfstæðisflokknum í Reykjavík." Nýlega seldu eigendur Vatnsenda Kópavogsbæ nýtingarrétt á hinu umdeilda landi og kemur beiðnin um vatnslögn í framhaldi af þeim kaupum. Borgarráð segir langvarandi óvissu um landa- og lögsögumörk valda þessari ákvörðun. Standa vonir til að með úrskurði óbyggðanefndar skýrist staðan en nefndin hefur til skoðunar lögsögumörk bæjarfélaganna.