Baráttan nær til Hawaii

Íbúar Hawaii upplifa nú nokkuð sem þeir eru ekki vanir þegar forsetakosningar eru annars vegar, nefnilega það að kosningastjórnir forsetaefnanna senda menn til að vinna þá á sitt band. Allt frá því að Hawaii varð ríki Bandaríkjanna 1959 hefur það verið eitt sterkustu ríkja demókrata sem hafa fagnað sigri þar í níu af ellefu forsetakosningum. Nú ber hins vegar svo við að mjótt er á munum. Dick Cheney varaforseti var sendur á staðinn fyrir repúblikana en demókratar sendu Al Gore, fyrrum varaforseta, og Alex, dóttur John Kerry, til að heilla heimamenn.