Ljónastóllinn uppáhald krakka

Jónína Guðnadóttir myndlistarmaður veit hvað flest börn gera þegar þau koma að heimsækja hana, nefnilega að stinga puttunum upp í ljónin á Ljónastólnum góða sem á sér heiðurssess í stofunni. "Við keyptum ljónastólinn á fornsölu í Danmörku árið 1973 og hann heitir svo á þessu heimili af því að það eru fjögur ljón á honum. Þetta er örugglega eikarstóll, mjög vandaður en orðinn ansi slitinn, sérstaklega áklæðið. Við höfum reyndar einu sinni látið bólstra hann upp en það er orðið ansi langt síðan. Ég þekki ekki sögu stólsins en hann er bæði mjög flottur og þægilegur." Hún segir stólinn hafa fylgt fjölskyldunni í meira en þrjátíu ár. "Ég veit ekki hversu gamall hann er, en mér þykir líklegt að hann sé að minnsta kosti frá því um aldamótin síðustu," segir Jónína og bætir við að hún hafi mikil dálæti á gömlum húsmunum með sál. "Það er eiginlega allt gamalt hérna hjá okkur og má eiginlega segja að annars vegar eigum við mjög gamla hluti og hins vegar mjög nútímalega. Við eigum til dæmis sófasett úr búi Guðjóns Samúelssonar." Annars hefur Jónína í nógu að snúast þessa dagana því sýning á verkum hennar, sem ber heitið Vötnin kvik, stendur nú yfir í Hafnarborg. "Nei, það eru engin ljón á sýningunni minni," segir hún og hlær, "en þar eru ýmsar skepnur aðrar, eðlur og skrímsli. Þema sýningarinnar er vatn og þar má sjá bæði fossa og niðurföll. " En engin ljón að þessu sinni.