58 fórust þegar lestir rákust á

Að minnsta kosti 58 manns fórust þegar tvær járnbrautalestir rákust á í norðurhluta Egyptalands á háannatíma í gærmorgun. Líklegt þykir að tala látinna fari hækkandi, því að á annað hundrað manns slösuðust jafnframt í slysinu, margir lífshættulega.

Slysið varð skammt fyrir utan borgina Qalyoub um klukkan sjö í gærmorgun, þegar vagnar lestarinnar voru fullir af fólki á leið til vinnu sinnar. Að sögn lögreglu er orsök slyssins talin vera sú að annar lestarstjórinn sinnti ekki stöðvunarskyldu.

Töluvert er um alvarleg lestarslys í Egyptalandi.