Ampop siglir til tunglsins

Hljómsveitin Ampop gefur út sína fjórðu plötu, Sail to the Moon, á þriðjudag. Platan fylgir eftir vinsældum My Delusions sem kom út seint á síðasta ári.

Titillagið My Delusions sló rækilega í gegn hér á landi og fékk það jafnframt mikla athygli í Bretlandi. Vakti lagið mikla athygli á Ampop, sem fram að því hafði verið þekktari fyrir fikt sitt við raftónlist en hreinræktað popp í anda Bítlanna.

Fóru upp í sveitKjartan F. Ólafsson, hljómborðs-leikari Ampop, viðurkennir að platan sé nokkurs konar rökrétt framhald af síðustu plötu. „Við vorum ekkert að leggja upp með neitt kon-sept. Við vorum bara komnir með það mikið efni að við vildum skella saman í plötu. Við tókum „session“ úti í sveit og fórum saman í Skálholt og til Seyðisfjarðar þar sem við einangruðum okkur aðeins,“ segir Kjartan. Hann bætir því við að nýja platan hafi verið unnin töluvert öðruvísi en My Delusions. „Þá unnum við þetta ákveðnar og vorum öruggari með það sem við ætluðum að gera. Núna fengum við tækifæri til að vinna með þeim sem við vildum og Arnar Helgi kom inn sem upptökustjóri eins og á síðustu plötu,“ segir hann. Fengu góða aðstoðStrákarnir fengu einnig Palla, fyrrum gítarleikara Maus og núverandi meðlim Fræs, til að útsetja strengi á þremur lögum á plötunni og gekk samstarfið við hann afar vel. Einnig fengu þeir þá Badda, Ella og Ásgeir úr Jeff Who? til að syngja bakraddir í laginu Gets Me Down, sem er þegar farið að hljóma í útvarpi. „Þetta er elsta lagið á plötunni en það passaði ekki inn á My Delusions. Við kláruðum upptökurnar með því að fá þá í partí og síðan hlustuðum við á plötuna saman,“ segir Kjartan. Til New York og L.A.

Útgáfutónleikar Ampop verða haldnir á Nasa föstudaginn 24. nóvember. Þetta verða síðustu tónleikarnir hjá þríeykinu hér á landi í langan tíma enda er hljómsveitin að leggjast í víking strax eftir áramót. Í janúar mun Ampop spila í New York og Los Angeles. Mun sveitin meðal annars spila á hinum goðsagnakennda tónleikastað Mercury Lounge í New York. Í febrúar heldur sveitin síðan tónleika í London.

Miðaverð á útgáfutónleikana er 1.000 krónur auk miðagjalds. Forsala fer fram í verslunum Skífunnar og á midi.is.