Heiðar skoraði í tapleik gegn Man Utd

Heiðar Helguson skoraði annað marka Fulham sem tapaði fyrir Man Utd, 4-2 í ensku úrvalsdeildinni í knattspyrnu nú í kvöld. Heiðar var í byrjunarliði Fulham og lék allan leikinn. Mark Heiðars kom með skalla á 37. mínútu eftir fyrirgjöf frá Wayne Bridge, lánsmanni frá Chelsea. Með markinu minnkaði Heiðar muninn í 3-2.

Christiano Ronaldo skoraði tvö marka Man Utd en þeir Louis Saha og Ji-Sung Park eitt hvor. Fulham er í 14. sæti deildarinnar með 29 stig, jafnmörg og Newcastle.

Man Utd er enn í 2. sæti deildarinnar með 51 stig, 12 stigum á eftir toppliði Chelsea sem á leik til góða gegn Liverpool á morgun.