Stórleikir í beinni á Sýn og NBA TV

Tveir leikir fara fram í úrslitakeppni NBA í kvöld og gefst íslenskum körfuboltaáhugamönnum tækifæri til að sjá þá báða í beinni útsendingu. Sjötti leikur Detroit og Cleveland verður í beinni á NBATV um miðnættið og sjötti leikur San Antonio og Dallas á Sýn klukkan 1:30.

Það sem gerir leiki kvöldsins sérstaka, er að meistarar San Antonio og meistarar ársins þar á undan, Detroit, geta bæði fallið úr keppni með tapi og það er nokkuð sem fáir hefðu geta ímyndað sér í upphafi keppninnar.

Cleveland hefur unnið þrjá leiki í röð gegn Detroit eftir að hafa tapað fyrstu tveimur illa og getur gert út um einvígið á heimavelli sínum í kvöld. Meistarar San Antonio eru í sömu stöðu, en þeir freista þess að jafna metin gegn Dallas í 3-3 á útivelli í kvöld. Dallas verður án Jason Terry í leiknum, en hann var dæmdur í bann fyrir að gefa Michael Finley hnefahögg í 5. leiknum.