Átta leikir í 10 marka mun eða meira

Mikið hefur verið rætt að undanförnu um þá stöðu sem upp er komin í kvennafótboltanum hér á Íslandi. Nokkurrar óánægju gætir meðal stuðningsmanna, áhugamanna og jafnvel þjálfara liða í deildinni með mótafyrirkomulag Íslandsmótsins vegna þeirrar þróunar sem íþróttin hefur tekið.

Áður fyrr þótti til undantekninga þegar leikjum í efstu deild kvenna lauk með 10-15 marka sigri. Í dag þykir það sjálfsagður hlutur og áhorfendur hafa ekki lengur áhuga á að fjölmenna á leiki í deildinni. 16 leikjum í Landsbankadeild kvenna hefur lokið með yfir 5 marka sigri í sumar og átta leikjum hefur lokið með yfir tíu marka sigri. Má þar nefna 15-0 sigur Vals á FH, 14-0 sigur Vals á Fylki og 13-1 sigur Breiðabliks á FH svo eitthvað sé nefnt. Áhorfendafjöldi á þessum leikjum hefur verið rokkandi á bilinu 50-150 manns sem hlýtur að vekja til umhugsunar um hvað skuli til bragðs taka.

Víðir Sigurðsson blaðamaður á Morgunblaðinu og höfundur bókaraðarinnar um íslenska knattspyrnu hefur fylgst með sportinu í gegnum smásjá í fjölda ára og þekkir hæðir og lægðir í íþróttinni. Hann segir að brotthvarf ÍBV úr deildinni hafi komið illa niður á henni. Eyjaliðið var með sterkari liðum deildarinnar en hafði að lokum ekki fjármagn til að standa undir rekstri liðsins. Víðir segir vissulega nokkra möguleika í stöðunni. Sjálfum líst honum best á að liðin leiki eina umferð áður en skipti verði í tvær fjögurra liða deildir, efri deild og neðri deild. Það skorti hins vegar frumkvæði knattspyrnufélaganna til að leggja fram tillögur um breytingar.