Eiður Smári: Mörkin munu koma

Eiður Smári Guðjohnsen kveðst handviss um að hann muni vera duglegri við að skora mörk fyrir Barcelona á næstu vikum heldur en hann hefur verið það sem af er leiktíð. Barcelona mætir Mallorca kl. 18 og er leikurinn í beinni útsendingu á Sýn. Eiður Smári verður að öllum líkindum í byrjunarliðinu.

"Ég er afslappaður og er handviss um að mörkin munu koma. Vonandi núna strax gegn Mallorca," sagði Eiður Smári á blaðamannafundi í gær. Íslenski landsliðsfyrirliðinn bætti því við að leikmenn liðsins væru sigurvissir þrátt fyrir öll þau meiðsli sem hrjá leikmannahópinn þessa dagana.

"Við erum ennþá að vinna leikina þrátt fyrir forföllin og erum í mjög góðri stöðu. Sigurinn gegn Zaragosa um síðustu helgi veitti okkur mikið sjálfstraust," sagði Eiður Smári.