Iron Lung spilar í kvöld

Bandaríska þungarokks­hljómsveitin Iron Lung heldur tónleika hér á landi í kvöld og annað kvöld. Iron Lung, sem er dúett, ætlar að hefja tónleikaferð sína um Evrópu hér á landi. Tónlist sveitarinnar er kraftmikil, þung og sér á báti.

Tríóið Death Metal Supersquad og hin blýþunga Plastic Gods hita upp á fyrri tónleikunum, sem verða í Kaffi Hljómalind. Hefjast þeir klukkan 19.00 og kostar 800 krónur inn. Á síðari tónleikunum, sem verða á Barnum, hita I Adapt og hin efnilega Celestine upp. Tónleikarnir hefjast klukkan 21.00 og er miðaverð einnig 800 krónur.