Frábæri frændinn ég

Kæri frændi

Mig langar bara til að þakka þér fyrir hvað þú hefur verið hugulsamur við okkur að láta fjölskylduna fylgjast með tækifærum sem opnast á markaðnum. Við erum öll alsæl með færeyska bankann sem þú lést okkur kaupa. Við vorum svolítið hikandi að fara með yfirdráttinn svona hátt til að kaupa þessi bréf, en þú getur ímyndað þér hvað við erum ánægð þegar upp er staðið.

Við hjónin keyptum fyrir 800 þúsund hvort og innleystum því samtals hátt í milljón í hagnaði. Gummi fór og gekk frá kaupum á hjólhýsi fyrir helgi, en við höfðum verið að skoða Fréttablaðið í leit að notuðum tjaldvagni. Hann Nonni okkar keypti fyrir miklu meira en við og notaði kennitölu systur sinnar sem aldrei tímir neinu. Hann bíður nú eftir nýjum bíl úr kassanum. Ég vildi bara láta þig vita að við erum alsæl hér í fjölskyldunni og metum ráðleggingar þínar og hugulsemi mikils.

Þín frænka Sigga

P.s.: Ég var að velta fyrir mér með yfirdráttinn, Er skynsamlegt að taka lán í japönskum jenum og greiða hann upp?

Svona bréf ylja manni um hjartaræturnar. Ég finn til þess hversu ættrækinn og elskulegur ég er í alla staði. Ég hef alltaf verið þeirrar náttúru gæddur að geta glaðst með öðrum. Það er náðargáfa sem hefur gert mér kleift að spila með öllum þessum stóru. Ég þekki menn sem hafa verið svo helteknir af afbrýðisemi að þeir hafa ekki getað grætt sjálfir vegna óttans við að aðrir græði meira.

Kæru landsmenn kíkið út um gluggann. Skín ekki sólin jafnt á alla? Ég hef flatmagað í sól og sumaryl þessa dagana. Þegar svona viðrar skortir mann ekki neitt. Vatn verður mesta auðlindin og fuglasöngurinn fegursta tónlistin. Stundum er nefnilega gæðunum algjörlega skipt eftir því hverjir kunna að njóta þeirra. Þá gilda engin önnur lögmál.

Spákaupmaðurinn á horninu