Spá meiri hagvexti

Samtök atvinnulífsins telja að líkur séu á að hagvöxtur á árinu 2007 mælist yfir fimm prósent en ekki innan við eitt prósent eins og fjármálaráðuneytið heldur fram.

Tölur um þróun vinnumarkaðar benda jafnframt til þess að mati samtakanna að framleiðniaukning á árinu 2006 hafi verið umtalsverð og hagvöxtur hafi verið allt að sex prósent. „Menn skoða ekki samhengi talnanna," segir Vilhjálmur Egilsson framkvæmdastjóri SA aðspurður um mismun á tölum Samtaka atvinnulífsins og fjármálaráðuneytisins.

Í greinargerð SA um horfur í efnahagsmálum kemur fram að mikil hækkun á fasteignaverði undanfarin ár hafi gert það ómögulegt að ná verðbólgumarkmiði Seðlabankans en stefna bankans hafi valdið skaða. Vaxtastefna Seðlabankans leiði til gengissveiflna á krónunni og líklegt sé að hún muni falla með hvelli á einhverjum tímapunkti.

Í greinargerðinni segir að þörf sé á nýjum viðhorfum í stjórn efnahags- og atvinnumála í ljósi þess að fjármálageirinn sé orðinn stærsti útflutningsatvinnuvegurinn. Tekjumyndun og sveiflur í efnahagslífinu muni í framtíðinni verða með allt öðrum hætti en áður hefur þekkst. - bg