McCann hjónin eru enn vongóð um að finna Madeleine

Foreldrar Madeleine eru farin aftur til Portúgal eftir að hafa verið í Marokkó þar sem þau höfðu leitað dóttur sinnar. Þau segjast ennþá vera vongóð um að finna Madeleine.

Núna eru liðnir 40 dagar síðan hinni fjögurra ára gömlu Madeleine McCann var rænt í Portúgal á meðan foreldrar hennar höfðu farið út að borða. "Fólkið í Marokkó er ótrúlega fjölskyldusinnað og okkur var sagt að mál Madeleine yrði rannsakað líkt og um innfætt barn væri að ræða," sagði Gerry McCann. "Við erum viss um að ef hún er í Marokkó muni hún finnast".

Hjónin segjast ekki hafa nein áform um að fara aftur til Englands fyrr en í lok sumars í fyrsta lagi. "Við verðum að finna hana, þetta má ekki enda sem óleyst mál," bætti faðir stúlkunnar við.