Tekst Boston að komast í úrslitin?

Boston Celtics getur í kvöld tryggt sér sæti í lokaúrslitum NBA deildarinnar með sigri í Detroit í sjötta leik liðanna í úrslitum Austurdeildarinnar. Leikurinn verður sýndur beint klukkan 00:30 á Stöð 2 Sport.

Boston hefur yfir 3-2 í einvíginu eftir góðan sigur á heimavelli sínum í fimmta leiknum, en í nótt verður leikið í Detroit.

Heimamenn munu þar þurfa á öllu sínu að halda enda eiga lykilmenn liðsins við meiðsli að stríða. Chauncey Billups er meiddur á læri en hefur verið að spila síðustu leiki, en óvíst er hvort skotbakvörðurinn Richard Hamilton geti leikið með í kvöld eftir að hafa meiðst á olnboga undir lok síðasta leiks.