Háöldruð morðkvendi

Tvær aldraðar konur í Bandaríkjunum hafa verið sakfelldar fyrir að myrða tvo heimilislausa menn til þess að fá líftryggingar þeirra greiddar.

Konurnar eru 75 og 77 ára gamlar. Þeim tókst að herja tvær milljónir dollara út úr tryggingafélögum.

Konurnar vinguðust við heimilislausa menn sem þær fundu á miðstöð fyrir heimilislausa í Hollywood. Þær gættu þess að þeir ættu enga ættingja sem gætu gert kröfur í dánarbú.

Þær keyptu handa mönnunum íbúðir og önnuðust um þá í tvö ár. Á meðan líftryggðu þær þá í botn. Tveggja ára tímabilið var nauðsynlegt til þess að tryggingarnar yrðu óumdeildar.

Að tveim árum liðnum gáfu þær mönnunum ólyfjan til að sljóvga þá og fóru svo með þá á fáfarna götu þar sem þær lögðu þá niður og keyrðu yfir þá. Þetta átti semsagt að líta út eins og bílslys sem hefði verið stungið af frá.

Fjölmiðlar hafa kallað vinkonurnar svörtu ekkjurnar. Þær eiga yfir höfði sér lífstíðar fangelsi.