Herskip sitja um sjóræningja

Bandarísk og frönsk herskip fylgjast nú með stórri franskri snekkju sem sjóræningjar hertóku undan strönd Sómalíu í gær.

Þrjátíu manna áhöfn er haldið í gíslingu, en engir farþegar eru um borð. Franska ríkisstjórnin hefur skipað sérstaka neyðarnefnd til þess að leysa málið.

Óstaðfestar fréttir herma að sjóræningjar á tveim hraðbátum hafi ráðist um borð í snekkjuna. Hún er áttatíu og átta metra löng og gengur bæði fyrir vélum og seglum. Lúxuskáetur eru um borð fyrir 64 farþega.

Sjórán eru algeng á þessum slóðum. Yfirleitt lýkur þeim með því að skipum og áhöfnum er sleppt eftir að lausnargjald hefur verið greitt.