Berbrjósta stúlka á umslagi

Berbrjósta skosk stúlka prýðir umslag fyrstu plötu hljómsveitarinnar The Viking Giant Show, The Lost Garden of the Hooligans, sem er nýkomin út.

Skoski ljósmyndarinn Brian Sweeney tók myndirnar í heimalandi sínu en hann bjó á sínum tíma hér á landi og tók meðal annars ljósmyndir fyrir síðustu plötu Botnleðju, Iceland National Park. Á umslagi hennar var umdeild mynd af allsnöktum karlmanni og er Sweeney því á svipuðum slóðum á þessari nýju plötu.

Heiðar Örn Kristjánson, forprakki The Viking Giant Show og fyrrverandi liðsmaður Botnleðju, vill ekki meina að Sweeney sé einhvers konar öfuguggi sem stundi það að taka nektarmyndir. „Þetta er mjög fínn ljósmyndari og hann hefur aðallega verið í músíkbrasanum að taka myndir af hljómsveitum. Hann tók líka myndir af yfirgefnum sveitabæjum hérna heima og hélt sýningu," segir hann. „Hann vildi endilega fá að gera þetta „cover" og hann var með þetta í sínum höndum. Ég gaf honum alveg lausan tauminn."

Heiðar Örn á ekki von á því að umslagið verði bannað erlendis þrátt fyrir nektina. „Það sjá allir að þarna er listin í hávegum höfð og þarna er ekkert sem viðkemur einhverjum sora. Þetta eru fallegar myndir og ef þetta fer fyrir brjóstið á fólki þá þarf það aðeins að líta í eigin barm."

Næstu tónleikar The Viking Giant Show verða í Iðnó í kvöld klukkan 21.30 á Iceland Airwaves-hátíðinni. Þar verða nýju lögin spiluð og vafalítið verður platan með þessu athyglisverða umslagi einnig á boðstólum. -fb