Fyrirhugaður bardagi Haye og Valuev af dagskrá?

Það ætlar að ganga erfiðlega fyrir Bretann David Haye, fyrrum heimsmeistara í cruiserweight-þyngdarflokknum, að næla sér í beltabardaga eftir að hann færði sig upp í þungavigtarflokk.

Haye átti upphaflega að mæta Vitali Klitschko í bardaga um WBC-þungavigtartitilinn 20. júní síðast liðinn en svo var hætt við hann og bardagi við yngri bróðurinn Wladimir Klitschko um IBF og WBO-þungavigtartitlana settur á í staðinn en það gekk ekki heldur upp.

Nú er útlit fyrir að fyrirhugaður bardagi Haye við Nikolai Valuev um WBA-þungavigtartitilinn sem fara átti fram í byrjun nóvember sé einnig að fara í súginn.

Þannig er mál með vexti að John Ruiz er í raun réttmætur áskorandi til þess að mæta hinum 2,13 metra háa Valuev og þó svo að Haye og Valuev hafi verið búnir að ná samkomulagi um að mætast þá hafði WBA-hnefaleikasambandið ekki enn gefið grænt ljós á bardagann.

Ruiz er ekki tilbúinn að stíga til hliðar og hleypa Haye fram fyrir sig og hótar að sækja málið fyrir rétti til þess að verja stöðu sína og rétt sinn á að mæta Valuev.

Útlit er því fyrir að Haye þurfi að bíða enn lengur en Klitschko bræðurnir eru sagðir óviljugir til þess að gefa Haye annað tækifæri eftir að hann bakkaði út úr bardögum við þá vegna meiðsla og ósættis í samningaviðræðum.