Mancini vill þjálfa á Englandi

Roberto Mancini segist reiðubúinn að snúa aftur í þjálfun. Hans helsta ósk er að taka við stjórnartaumunum hjá ensku liði en síðustu ár hefur hann verið orðaður við ýmis lið í ensku úrvalsdeildinni.

„Enska deildin er að mínu mati sterkasta deild í heimi og því væri áhugavert að fá að prófa hæfni sína í þeirri deild. Það er minn draumur að þjálfa næst utan Ítalíu," sagði Mancini.

Mancini hefur síðustu ár m.a. verið orðaður við Sunderland, Chelsea og Manchester City en hann hefur verið án starfs síðan hann hætti þjálfun Ítalíumeistara Inter.