Drakk rjómaís við þorsta

Kanadíski leikarinn Ryan Gosling var á sínum tíma orðaður við hlutverk Jacks Salmon í kvikmyndinni The Lovely Bones. Leikarinn þyngdi sig talsvert fyrir hlutverkið en á endanum var Mark Wahlberg ráðinn í hans stað.

„Ég og Peter Jackson, leikstjóri myndarinnar, höfðum ólíkar hugmyndir um hvernig persónan Jack Salmon ætti að líta út. Ég var tæp 70 kíló þegar Jackson réði mig en svo þegar tökur áttu að hefjast var ég orðinn 20 kílóum þyngri. Mér fannst að persónan ætti að vera svolítið feit og þess vegna stundaði ég það að bræða rjómaís og drekka hann þegar ég varð þyrstur.

Mér fannst þetta frábært og ég var spenntur fyrir hlutverkinu," útskýrir leikarinn.

Peter Jackson var þó á öðru máli og skipaði Gosling í ræktina. Á endanum fór svo að Mark Wahlberg var ráðinn í hans stað.

„Við Jackson vorum mjög ósammála um persónusköpunina og þess vegna gekk samstarf okkar ekki," sagði Gosling að lokum.