Steindinn okkar bannaður innan 12 ára

Gamanþátturinn Steindinn okkar hefur göngu sína á Stöð 2 í kvöld. Þetta er sketsaþáttur með grínaranum Steinda Jr. sem fær fjöldann allan af þjóðþekktum Íslendingum til leiks. Má þar nefna Jóhönnu Guðrunu, Ólaf Darra, Haffa Haff, Helga Seljan, Þorstein Guðmundsson, Sindra Sindrason og fleiri.

Vakið hefur athygli að þátturinn er á dagskrá frekar seint um kvöldið, eftir níu, og auk þess er hann bannaður innan 12 ára. Steindi Jr. og Ágúst Bent leikstjóri harðneita því þó að hér sé gróft efni á ferðinni. Enda séu þeir dagfarsprúðir menn.

Steindi verður í viðtali í Íslandi í dag í kvöld og svo er þátturinn á dagskrá klukkan 21.20.

Hér er að finna þrælfyndið sýnishorn úr þættinum þar sem Steindi setur sig í spor fótboltabullu sem lifir fyrir næsta leik.