Fikrar sig upp á yfirborðið

Þrátt fyrir ungan aldur spannar ferill Ryans Gosling næstum tuttugu ár, en hann verður að teljast einn eftirsóttasti leikari Hollywood um þessar mundir. Hann hefur að mestu leyti eytt tíma sínum í óháða kvikmyndageiranum en er smám saman að fikra sig upp á yfirborðið.

Ryan Gosling leikur aðalhlutverkið í Crazy Stupid Love sem verður frumsýnd um helgina, en þetta er fyrsta gamanmynd leikarans. Gosling leikur þar ungan glaumgosa sem reynir að kenna hinum fráskilda Cal Weaver, sem leikinn er af Steve Carell, að njóta lífsins upp á nýtt. Julianne Moore, Emma Stone, Marisa Tomei og Kevin Bacon leika einnig stór hlutverk í myndinni, sem fengið hefur afbragðsgóða dóma.

Ryan Gosling er fæddur í nóvember 1980. Hann byrjaði snemma að leika og var meðal annars hluti af Mikka mús-klúbbnum þar sem Christina Aguilera, Britney Spears og Justin Timberlake voru meðal samstarfsfélaga hans Christina Aguilera, Britney Spears og Justin Timberlake. Gosling ákvað hins vegar að feta leiklistarbrautina þrátt fyrir að tónlistin togi í hann af og til, hann er meðal annars í hljómsveitinni Dead Man's Bones sem gaf út samnefndan disk árið 2009. Þrátt fyrir að Gosling teljist meðal kynþokkafyllstu karlmanna heims átti hann síður en svo auðvelda æsku; hann var mikið lagður í einelti og að endingu ákváðu foreldrar hans að taka hann úr skóla og kenna honum heima.

Gosling hefði vel getað fest í hlutverki hjartaknúsarans eftir að hafa grætt hverja einasta unglingsstúlku í kvikmyndinni The Notebook. En Gosling ákvað að halda aðra leið; hann tók að sér hlutverk sérvitringa og utangarðsmanna í óháðum kvikmyndum. Hann sýndi stjörnuleik í kvikmyndunum Half Nelson, sem hann var tilnefndur til Óskarsverðlauna fyrir, og Lars and the Real Girl auk Blue Valentine. Gosling hafði samþykkt að leika í kvikmynd Dags Kára, The Good Heart, en annríkið eftir Óskarsverðlaunatilnefninguna kom í veg fyrir samstarfið.

Leikarinn virðist hins vegar smám saman vera að fikra sig upp á yfirborð Hollywood-markaðs-vélarinnar; hann leikur á móti heilum her stórleikara í The Ides of March en þar má meðal annars finna stjörnur á borð við George Clooney, Marisu Tomei, Paul Giamatti og Philip Seymour Hoffman.

freyrgigja@frettabladid.is