Drive stendur upp úr

Kvikmyndaspekúlantar eru farnir að gera upp árið 2011 og velja bestu myndir ársins. Drive eftir danska leikstjórann Nicholas Winding Refn virðist vera fremst meðal jafningja.

Kvikmyndarýnar Empire, Total Film og Rolling Stone hafa allir sett hasarmyndina Drive í efsta sætið hjá sér yfir kvikmyndir ársins 2011. Í umsögn Total Film kemur meðal annars fram að „gagnkynhneigðir karlmenn hafi orðið hálf samkynhneigðir yfir Ryan Gosling". Honum hafi tekist að láta satínjakka og tannstöngla líta út fyrir að vera svala fylgihluti.

Drive segir frá hinum nafnlausa ökumanni sem Gosling leikur. Hann sinnir áhættuakstri fyrir Hollywood-kvikmyndir á daginn en ekur flóttabifreiðum fyrir glæpamenn á kvöldin. Hann hefur mjög einfaldar lífsreglur: hann vinnur aldrei fyrir sama aðilann tvisvar og gefur ræningjunum aðeins fimm mínútur til að athafna sig.

Hann vingast óvart við nágrannakonu sína og son hennar en þegar eiginmaður hennar losnar úr fangelsi fer af stað óvænt og fremur blóðdrifin atburðarás.

Drive er hugarfóstur framleiðandans Marc Platt sem keypti kvikmyndaréttinn að bók James Sallis, The Driver. Platt sagði að honum fyndist aðalsögupersónan í bókinni minna sig á hetjurnar sínar úr barnæsku, þá Clint Eastwood og Steve McQueen.

Platt hafði strax mjög sterka skoðun á því hver ætti að leika aðalhlutverkið, efstur á blaði hjá honum Ryan Gosling. Stjarnan fékk síðan að vera með í ráðum þegar ráðinn var leikstjóri og í huga leikarans kom aðeins einn til greina, hinn danski Nicolas Winding Refn. En kvikmynd hans, Bronson, hafði vakið mikla athygli meðal elítunnar í Hollywood. Refn var mikill aðdáandi sjónvarpsþáttanna Breaking Bad og Bryan Cranston var því einn af fyrstu leikurunum sem hann fékk um borð. Refn lýsir því síðan sem ást við fyrstu sýn þegar hann hitti Carey Mulligan. „Ég vissi strax að ég hefði fundið aðalleikkonuna okkar."

Drive var ódýr í framleiðslu þrátt fyrir að hafa í fyrstu verið hugsuð sem miðasölusprengja, hún kostaði eingöngu þrettán milljónir dollara. Sökum þess hversu lítið fjármagn tökuliðið hafði á milli handanna var ákveðið að taka hana í Los Angeles og Refn valdi tökustaðina á rúntinum með Gosling. Leikstjórinn fór fram á það við aðalleikarana og handritshöfundinn Hossein Amini að þau byggju hjá honum meðan á tökunum stæði til að hægt væri að vinna í handritinu þegar stund gæfist milli stríða. Gosling lék sjálfur í mörgum af helstu ökuatriðum myndarinnar eftir að hafa farið á námskeið hjá áhættuökuþórum og nánast engum tölvutæknibrellum var beitt; Refn vildi lágmarka slíka tækni til að eyðileggja ekki áferðina.

Að endingu varð mönnum ljóst að Drive var alls ekki svokallaður „blockbuster" og var því ákveðið að markaðssetja hana sem „independent". Myndin sló fyrst í gegn á Cannes-kvikmyndahátíðinni þar sem áhorfendur risu úr sætum til að hylla hana og Refn fékk Gullpálmann fyrir bestu leikstjórn. Myndin hefur að endingu orðið að költ-fyrirbæri og gert það að verkum að 2011 er ár Ryan Gosling.

freyrgigja@frettabladid.is