Vill breyta nafni sínu í Sugarpova

Tennisdrottningin Maria Sharapova íhugar nú að breyta nafni í Sugarpova svo hún geti auglýst sælgætisfyrirtæki.

Hugmynd Sharapovu er að breyta nafni sínu aðeins meðan á US Open stendur en það er eitt af risamótunum fjórum í tennis. Eftir mótið ætlar hún að taka aftur upp fyrra nafn.

Sharapova hefur þegar sótt um nafnabreytinguna hjá hjá yfirvöldum í Flórída og verður afar áhugavert að sjá hvort hún fái þessa tímabundnu breytingu samþykkta.

Þessi 26 ára Rússi var efst á lista Forbes í fyrra yfir þær íþróttakonur sem þénuðu mest þannig að hún er ekki beint á flæðiskeri stödd fjárhagslega.

Samingurinn við Sugarpova mun ef að líkum lætur gefa ansi vel í aðra hönd.