"Alli Abstrakt dó sumarið 2013“

Alexander Jarl frumflytur á Vísi sitt fyrsta lag, Ekki þannig, en myndband við lagið er að finna neðar í fréttinni.

Alexander Jarl gekk áður undir listamannanafninu Alli Abstrakt.

„Alli Abstrakt dó sumarið 2013. Mér finnst engin þörf á viðurnefninu lengur þar sem tónlistin sem ég geri núna kemur beint frá mér, óritskoðað frá hjartanu, en ekki bara eitthvað rapp um hver er bestur,“ segir Alexander Jarl.

„Það áttu sér stað róttækar breytingar í mínu lífi þetta ár sem leiddu til þess að ég byrjaði aftur að tjá mig í tónlistinni eftir langa fjarveru. Ég hafði verið fastur í sama fari alltof lengi og fékk leið því en nú eru nýir tímar, ég er mjög spenntur að gefa þetta út og sjá hvernig fólk tekur í Jarlinn,“ heldur hann áfram.

Að sögn Alexanders byrjaði hann snemma í músík. 



„Ég byrjaði 15 ára í taktasmíðinni og fór fljótlega þar eftir að skrifa texta. Síðan þá hefur maður dútlað við ýmis hljóðfæri en ég finn mig best í pródúseringunni og textagerð,“ útskýrir Alexander en hann hefur fengið dygga aðstoð vina sinna við tónlistarsköpunina.

„Það er eins og örlög annars hvers manns úr Vesturbænum liggi í tónlistinni og margir af mínum æskuvinum eru mjög færir pródúserar og veita mér mikinn innblástur,“ segir Alexander.

Þær sögur hafa lengi gengið um föður Alexanders, að hann hafi verið NBA-stjarna.

 „Ég er oft spurður út í þetta en hér er stór misskilningur á ferð,“ segir Alexander og hlær.  

„Kallinn spilaði stutt tímabil í ABA (American Basketball Association) en fékk engar mínútur á vellinum! Ég fékk sjálfur boð að spila fyrir lið í þeirri deild en átti of margt ógert hér á klakanum til að flytja út. Við feðgarnir eigum mjög furðulegt samband en við dettum alltaf í grimman one-on-one þegar ég kíki til hans í USA,“ útskýrir Alexander.

Aðspurður segist Alexander Jarl ekki vita hvað sé á döfinni.

„Ég hef ekkert ákveðið annað en að halda áfram að gera mína tónlist og dæla henni út á lýðinn. Framhaldið er óljóst,“ segir Alexander að lokum.