Reykvíkingar láta ljós sitt skína

„Ég vona að sem flestir kýli á þetta því það eru 10 milljónir í verðlaun og það verður hrikalega gaman hjá okkur í vetur,“ segir Auðunn Blöndal, þáttarstjórnandi Ísland got talent sem verður á dagskrá í vetur á Stöð 2.

Á morgun og sunnudags frá klukkan 10 fara fram áheyrnarprufur fyrir þáttinn í Reykjavík þar sem hæfileikaríkir keppendur eru sigtaðir út. Fólk á öllum aldri er hvatt til að mæta upp í Fjölbrautaskólann í Breiðholti og sýna hvað í því býr.

Leitað er að einstaklingum sem og hópum eða pörum sem geta sungið, dansað, leikið, gert töfrabrögð, áhættuatriði og fleira.

Dómarar Ísland got talent-þáttaraðarinnar eru þau Bubbi Morthens, Þorgerður Katrín Gunnarsdóttir, Jón Jónsson og Þórunn Antonía Magnúsdóttir. Á Facebook-síðu Stöðvar 2 er fólk einnig hvatt til að tagga einstakt og hæfileikaríkt fólk á síðunni.

„Við erum búin að halda prufur hringinn í kringum landið og endum núna í Reykjavík. Það er spáð miklu af fólki um helgina og við hvetjum alla til að mæta því þetta verður mikið stuð,“ segir Auðunn glaður í bragði.