Alþjóðleg tónlistarakademía í Hörpu

Alþjóðlega tónlistarakademían Harpa International Music Academy er alþjóðlegt sumarnámskeið sem haldið verður í annað sinn í Hörpu dagana 7. til 17. júní næstkomandi.

Námskeiðið stendur í 11 daga og lýkur með hátíðartónleikum í Hörpu á þjóðhátíðardaginn 17. júní. Á námskeiðinu verður kennt á fiðlu, víólu, selló og píanó og hefur akademían fengið til liðs við sig framúrskarandi leiðbeinendur víðs vegar að. Áhersla verður lögð á kammertónlist auk einkatíma, masterklassa og hljómsveitar.

„Við lítum á þetta sem nokkurs konar stökkpall fyrir framúrskarandi tónlistarnemendur sem eru að hasla sér völl á tónleikasviðinu,“ segir Lin Wei Sigurgeirsson, listrænn stjórnandi Alþjóðlegu tónlistarakademíunnar í Hörpu. „Hingað koma 54 tónlistarnemendur frá átta löndum og fjörutíu íslenskir nemendur taka einnig þátt. Þau spila saman, æfa saman og mynda tengsl sín á milli, sem kemur þeim öllum til góða bæði í núinu og til lengri tíma.“



Opnunartónleikar Alþjóðlegu tónlistarakademíunnar í Hörpu verða mánudaginn 9. júní klukkan 17 í Norðurljósum. Þar leikur hinn kóreski In Mo Yang, 18 ára verðlaunahafi í Menuhin-fiðlukeppninni sem haldin var í Texas í mars síðastliðnum, þekkt einleiksverk fyrir fiðlu. Meðleikari er Richard Simm.



Þrír ungir einleikarar frá Noregi munu einnig koma fram á opnunartónleikunum 9. júní Þetta eru víóluleikarinn Eivind Holtsmark Ringstad, sigurvegari Eurovision Young Musician 2012, fiðluleikarinn Sonoko Miriam Shimano Welde, sem keppir í sömu keppni fyrir hönd Noregs um þessar mundir, og Sandra Lied Haga, sellóleikari sem einnig hefur unnið til alþjóðlegra verðlauna.



Á tónleikunum 16. júní leika síðan norsku ungmennin einleik hvert fyrir sig og á hátíðartónleikunum, þann 17. júní, leika ýmsir þátttakendur akademíunnar hátíðartónlist.