Bandaríkjamenn skellihlæja að súkkulaðikökuáti Sigmundar Davíðs

Súkkulaðikökuát Sigmundar Davíðs Gunnlaugssonar forsætisráðherra var tekið fyrir í einum vinsælasta spurningaþætti heimsins, Wait Wait… Don't Tell Me á útvarpsstöðinni NPR (National Public Radio) á dögunum.

Í þættinum þarf fólk að giska í eyðurnar en teknar eru fyrir furðufréttir úr öllum heimshornum. Þátturinn hefur verið í gangi frá árinu 1998 og er líklega vinsælasti spurninga- og grínþátturinn í útvarpi vestan hafs.

Stjórnarandstaðan varð æf síðastliðinn mánudag þegar Sigmundur Davíð var ekki viðstaddur þegar fyrirspurn Svandísar Svavarsdóttur, þingmanns Vinstri grænna, var til umræða. Svandís sagði hegðun Sigmundar með algjörum ólíkindum.

Sjá einnig:Í ósamstæðum skóm á fundi með Obama

„Og virðulegur forseti, var hann að fara á fund? Var að hann tala við Alþjóðagjaldeyrissjóðinn eða Sameinuðu þjóðirnar eða hvað?“

Á þessum tímapunkti var orðið „súkkulaðikaka“ hrópað úr þingsal.

„Hann var að fá sér köku, virðulegur forseti!” sagði þá Svandís.

Helgi Hrafn Gunnarsson, þingmaður pírata, sagði að hann hefði ekki haldið að neitt í hegðun forsætisráðherra lengur gæti komi honum á óvart.

„Virðulegur forseti, ég hélt að ég væri endanlega hættur að verða hissa á nokkurs konar lítilsvirðingu hæstvirts forsætisráðherra gagnvart þinginu en í þetta sinn varð ég pínulítið hissa.”

„Og þetta er satt“

Í útvarpsþættinum Wait Wait…Don't tell me á laugardaginn var komið inn á skemmtilegar fréttir vestra og víðar í heiminum. Lögreglumenn sem þurftu að hjálpa manni sem festist í körfuboltahring í Seattle var dæmi um frétt sem tekin var fyrir en síðar var komið að forsætisráðherra vor.

Spurt var: Í vikunni sem leið skaust forsætisráðherra Íslands úr þingsal meðan hann sat fyrir svörum kollega sinna í þinginu til þess að gera hvað?

Peter Grosz, bandarískur leikari sem sat fyrir svörum, giskaði á að Sigmundur hefði ætlað að flýja Ísland sem var augljóslega ekki rétt svar. Meðal annarra gesta í þættinum var leikarinn góðkunni Steve Buscemi.

„Nei, til þess að næla sér í síðustu sneiðina af ókeypis köku,“ upplýsti þáttastjórnandinn Peter Sagal áhorfendur í hljóðveri í New York sem skelltu upp úr.

Sjá einnig:Fjarverandi á Alþingi en reyndist lukkutröll íshokkílandsliðsins

Sagal, sem þykir afar fyndinn þáttastjórnandi, hélt áfram:

„Hann flúði í miðri umræðu með þjóðarhagsmuni að leiðarljósi þar sem hann taldi að kakan væri að verða búin. Gagnrýni svaraði hann á þann veg, og þetta er satt, að um Djöflatertu væri að ræða, með kremi, þeyttum rjóma og niðursoðnum perum.“

Skelltu áhorfendur upp úr á nýjan leik.

Einnar hæðar Djöflaterta

Má ætla að Peter Sagal hafi fengið ítarlegar upplýsingar sínar um súkkulaðikökuna girnilegu í gegnum frétt Nútímans þar sem kakan var greind því sem næst í öreindir.

„Kakan var þó aðeins einnar hæðar og boðið var upp á rjóma með. Heimildir Nútímans herma að Sigmundur hafi fengið síðustu sneiðina, lokað sig af og borðað hana,“ sagði í frétt Nútímans.

Sigmundur og súkkulaðikakan voru tekin fyrir í hlutanum Listen to the Story sem heyra má í spilaranum að neðan. Spurningin um ráðherra okkar er borin upp eftir um fjóra og hálfa mínútu.