Enn eitt gullið hjá Hrafnhildi | Myndir

Sundkonan Hrafnhildur Lúthersdóttir lauk keppni á Smáþjóðaleikunum í dag með glæsibrag.

Ernir Eyjólfsson, ljósmyndari Fréttablaðsins og Vísis, var í Laugardalslauginni og tók myndirnar sem fylgja fréttinni.

Hrafnhildur kom fyrst í mark í 400 metra fjórsundi á tímanum 4:46,70 mínútum og stórbætti Íslands- og mótsmetið í greininni. Jóhanna Gerða Gústafsdóttir átti bæði metin en hún fékk silfurverðlaun í 400 metra fjórsundinu í dag á tímanum 4:53,55 mínútum.

Hrafnhildur vann alls fern gullverðlaun á Smáþjóðaleikunum; í 100 og 200 metra bringusundi og 200 og 400 metra fjórsundi. Hún setti Íslands- og mótsmet í öllum greinunum og náði Ólympíulágmarki í 200 metra bringusundi og 200 og 400 metra fjórsundi.

Anton Sveinn McKee fékk bronsverðlaun í 400 metra fjórsundi í karlaflokki en hann synti á tímanum 4:32,99 mínútum. Kristinn Þórarinsson endaði í 7. sæti á tímanum 4:44,95 mínútum.